Katlavöllur hefur nú verið opnaður gestum. Tímasetningin er með fyrra lagi og er ástand vallarins mjög gott. Vetrarflatir eru á brautum 1, 3 og 8 en reiknað er með að þær opni bráðlega.

Golfklúbbur Húsavíkur hefur ráðið Benedikt Þór Jóhannsson sem rekstrar- og vallarstjóra félagsins. Benedikt er öllum hnútum kunnugur á Katlavelli en hann hefur starfað á vellinum í 8 sumur áður fyrr auk þess að leysa af á síðasta sumri. Einnig hefur hann starfað á Jaðarsvelli á Akureyri.
Síðustu ár hefur félagið einungis verið rekið með sumarstarfsfólki en á síðasta aðalfundi félagsins var samþykkt að ráða starfsmann í 100% starf til að hafa umsjón með rekstri og vallarstarfsemi. Klúbburinn hefur stækkað töluvert síðustu ár og umfang rekstrar aukist. Erfiðlega hefur gengið að fá félaga til að sinna sjálfboðaliðastörfum innan klúbbsins og flest verkefni lent á höndum fárra. Er það von að með ráðningu starfsmanns í 100% stöðugildi, skapist tækifæri til enn frekari uppbyggingar og markaðssetningar vallarins. Að sjálfsögðu mun verða áfram þörf á sjálfboðaliðastarfi og eru allir félagsmenn hvattir til að taka þátt, því öflugt innra starf mun efla starfsemina og gera Katlavöll að eftirsóttum golfvelli.
Á meðfylgjandi mynd eru þau Birna Ásgeirsdóttir, formaður GH og Benedikt Þór Jóhannsson, verðandi rekstar- og vallarstjóri. Við bjóðum Benedikt velkominn til starfa.

640 Veitingar ehf. hafa skrifað undir samning við Golfklúbb Húsavíkur um leigu og rekstur veitingasölu í Golfskálanum. Það eru þeir félagarnir Haukur Ákason og Hrólfur Jón Flosason sem standa á bak við reksturinn. Munu þeir bjóða upp á hádegismat, alla virka daga vikunnar og utan þess og um helgar verða þeir einnig með léttan matseðil. Einnig munu þeir bjóða upp á veisluþjónustu og salarleigu í Golfskálanum.
Íþróttaviðburðir vera sýndir í beinni dagskrá á risaskjá í Golfskálanum þegar þeir eru í gangi s.s. enski boltinn ofl. Eins hafa þeir komið upp fullkomnu píluspjaldi með sjálfvirkum teljara.
Þetta mun færa líf og fjör í Golfskálann en fyrir er Golfklúbbur Húsavíkur með tvo fullkomna Trackman golfherma sem hægt er að bóka sig í.
Veitingastaðurinn verður opnaður laugardaginn 1. febrúar, kl. 14:00. Fólk er hvatt til að mæta og prófa þessa frábæru þjónustu.

Nú liggur fyrir að golfklúbburinn muni annast og reka veitingasölu í golfskálanum í sumar. Stefnt er að bjóða upp á veitingar frá hádegi og fram eftir kvöldi. Unnið er hörðum höndum við að undirbúa komandi sumar og er starfsfólk skálans spennt að taka á móti gestum sumarsins.

Golfnámskeið barna og unglinga hefst 5. júní. Kennt verður eftir hádegi, mánudaga og miðvikudaga fram til 2. ágúst. Námskeiðið kostar 27.000 kr. Hægt er að nýta sér frístundastyrk Norðurþings.

Kennarar eru: Karl Hannes Sigurðsson, barna- og nýliðakennari og Valur Snær Guðmundsson, klúbbmeistari GH. Kylfur eru á staðnum fyrir þau sem þess þurfa.

Námskeiðið hentar þeim sem vilja læra grunntækni golfsins ásamt þeim eru lengra komnir.

Skráning fer fram HÉR

Á aðalfundi Golfklúbbs Húsavíkur sem haldinn var 15. mars sl. var ákveðið að breyta uppröðun vallarins með tilkomu nýrrar aðkomu að vellinum.  Önnur braut breytist í fyrstu braut og verður spilað hefðbundið þar til gömlu níundu braut líkur en þá tekur við síðasta brautin sem er gamla fyrsta braut. Ef gömlu númerin eru notið þá lítur völlurinn svona út: 2-3-4-5-6-7-8-9-1

Stjórn Golfklúbbs Húsavíkur hefur samið við Jón Elvar Steindórsson um rekstur golfskálans í sumar. Aðspurður segir Jón Elvar þetta kjörið verkefni fyrir fjölskylduna í sumar. Þau munu leggja metnað sinn í að taka vel á móti fólki sem kemur til að spila golf á þessum fallega 9 holu velli eða þeim sem einfaldlega reka inn nefið til að fá sér kaffibolla og fylgjast með kylfingum á vellinum. Ef að líkum lætur, verðu margt fólk á vellinum í sumar. Jón Elvar er matreiðslumaður að mennt og hefur víðtæka reynslu á rekstri gegnum árin.

Ný stjórn Golfklúbbs Húsavíkur tók þá ákvörðun á sínum fyrsta fundi að hún myndi einnig sinna hlutverki húsnefndar þetta árið.

Síðustu ár hafa verið miklar umræður innan klúbbsins um byggingu nýs golfskála og í raun stöndum við enn á upphafsreit í þeim efnum. Markmið nýrrar stjórnar er að láta draum félagsmanna um nýjan golfskála rætast á næstu 3 árum. Á meðan þarf starfsemin að vera í núverandi golfskála en ljóst er að viðhald á honum hefur verið takmarkað síðustu ár og hann illa farinn. Nauðsynlegt er að fara í viðhald á ytra byrði hússins til að hindra streymi vatns inn í húsið. Búið er að meta hvað þarf að gera og mun sú vinna hefjast eins fljótt og verður leyfir.

Á meðan beðið er eftir góðu verðri til framkvæmda utandyra, ákvað stjórnin að taka til hendinni innandyra, laga til,  endurnýja skrifstofuna, mála salinn, pússa upp gólfið og bera á það, betrumbæta aðstöðuna við eldhúsið o.fl. Þessar framkvæmdir hafa ekki verið kostnaðarsamar þar sem stjórnin hefur unnið þetta allt sjálf með dyggri aðstoð og góðum ráðum fagmanna innan klúbbsins. Má segja að þær systur Birna og Kiddý Hörn Ásgeirsdætur hafi borið mestan hita og þunga af skipulagningu og framkvæmdum innandyra.